Am Morge früeh bin i verwache,
vomä Traum und han grad welle,
no bevor i Kaffi mache,
em Maa die ganzi Gschicht verzelle.

Dezue muess i no schnäll erwähne,
dass es Winterzyt isch gsi,
und i mit eme warme Pischi
guet aagleit go schloofe bi.

Im Traum, do bini mit em Bus
in d'Stadt, will i ha gfunde,
s'Bescht, i gang, will's chalt isch duss,
in d'Sauna es paar Stunde.

Was dört verruckts alls isch passiert
- i has grad welle säge -
do luegi plötzlich chli verstört
und au ä chli verläge:

I sitz jo nackend bis uf d'Hutt
im Bett und ummi umme,
hani, dass i nid so blutt,
es Badtuech um mi g'schlunge.

De Maa lacht luut und mir isch grad
vor Schreck de Traum devo.
I glaube nümm - ach isch das schad,
dass er wird ume cho.